காத்துக்கொண்டிருக்கிறேன்
___________________________________
அடர் மழை குறைந்து
தூவும் தூவானத்திடை
பழைய காதலொன்றை
ஆர்ப்பாட்டமாய் ஆலாபிக்கிறாய்
ஆறி விட்ட தேநீர் கோப்பை
அவசரமாய் மீண்டும் சூடேறுகிறது
எவ்வளவோ முயன்றும் என்னுள்
புதைந்த நேச முகம்
முகவரி மறந்துவிட்டது
நினைவடுக்குகளின் நீள்தேடலில்
நானிருக்கையில்
முன்னுன் மனங்கவர்ந்தவளின்
காதோர தேமலை
வர்ணித்துக்கொண்டிருந்தாய்
காதலை கசியவிடும்
ஜாடை பார்வை கண்டு நான்
உருகி நிற்கையில்
உன்னவளுடன் தேரேறி
பறந்து விட்டாய்
தேடலின் நிறைவில் பெற்ற உன்
காதல் கண்களை சுமந்தபடி
நீ விட்டு சென்ற இடத்திலேயே
காத்துக்கொண்டிருக்கிறேன் நான் .
0 comments:
Post a Comment